أرشيف المقالات

الصفحة الرابعة من سورة النور

المطلوب:
1- قراءة الصفحة 3 مرات يوميًا.
2- قراءة التفسير .

التطبيق العملي:
أولاً: تعلم آداب الاستئذان واحترام خصوصية الآخرين وتطبيق ذلك.
- الاستئذان قبل دخول البيوت، وقبل الذهاب للبيوت أيضًا.
- عدم إطلاق البصر أو التحرك بحرية في بيوت الآخرين بغير إذنهم -وإذنهم مش بسيف الحياء ، يعني مش أنا داخلة غرفة نومك عندك اعتراض؟ فتتحرج منك-.

- نفس الكلام منطبق على الاتصال بهم وعلى رسائل الفيس والواتس وكل وسائل الاتصال.. 
تذكر! أنت لست "مضاد حيوي كل 8 ساعات"، فلا تواصل الاتصال ليرد المتصل رغمًا عنه.
نريد أن نطبق: {وَإِن قِيلَ لَكُمُ ارْجِعُوا فَارْجِعُوا هُوَ أَزْكَىٰ} [النور من الآية:28].
فهو اأكى لنا بلا غضب ولا عتاب.

- بلاش الله يكرمك النظرة الفاحصة المدققة لبيوت الناس: "الستاير دي رخيصة، الستاير دي تحفة واضح أنها غالية، يع التراب مالي البيت، مصمصة الشفايف..
إلخ"، خائنة الأعين يراها الله ويحاسبك عليها، فلاحظي أختي أن الله أمر بغض البصر بعد آيات آداب البيوت.

ثانيًا: غض البصر .
- الزملاء والمشاة في الشوارع داخلين في غض البصر!
- المسلسلات والأفلام ليست استثناء من غض البصر.
إذًا كيف سنشاهدها؟ كيف أشاهد إذا كنت سـأغض بصري؟! لا تشاهدونها من الأصل!

ثالثًا: الحجاب الحجاب.
فرصتك بقة إحنا بنطبق ونحفظ عاوزين: {يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُم بِمَا كَانُوا يَعْمَلُونَ} [النور:24]، تشهد أننا بنسمع كلام ربنا مش عصاة.

هم صورتين للحجاب وصورة ثالثة أدناهم.
1- يا نقاب..
ومش نقاب أبو شخاليل، لا نقاب كدة بخمار طويل أو ملحفة، أو الحاجات الواسعة أوي دي، أه إحنا مش هنغظي وشنا ونجسم كل حاجة تانية! 

ونظام عباية ضيقة وبحب أكون شيك والطرحة أحلى من شعري ده مينفعش يا فندم، نظام النقاب اللي هفهاف يهفهف الرجال أكثر من شعرك الأكرت اللي بقاله 3 سنين مستحماش مش هينفع. 

ونظام الكحل ورسم العين، مينفعش، ومتبقيش لبسالي نقاب وحطالي صورة عينك الساحرة على الفيس!
نقاب يعني ستر كامل كامل يعني. 

2- خمار من غير نقاب.
وده مش إشارة خضرا إنك تحطي شخاليل برضه، خمار يعني زيك زي أم نقاب بس فقط مش حاطة غطاء وجه. 

3- عباية وطرحة طويلة.
طرحة أيييييه؟! طويلة مش طرحة مبينة فتحة العباية. 
والعباية على فكرة لازم تبقى واسعة، فيه فرق بين العباية وفستان السواريه على فكرة. 
عباية بدون زينة وتكون واسعة. 

- حضرتك الحجاب على رأي اللي قالوا: "يشمل البلكونة، والفيس، والتويتر، والانستجرام، والواتس". 
- سعادتك الذهب اللي بيلمع وسط العباية السودة زينة، والآية فيها نهي عن إبداء الزينة.
- حبيبتي الجزمة أم كعب اللي بتوجع رجلك دي..
أيوة اللي بتعمل كالو، مفيش داع ليها خالص، خليها لجوزك، بلاش تمايل في الشارع.

- سعادتك (البرفان) في الشارع غلط جدًا وفيه نهي شديد، ووصف النبي المستعطرة في الشارع بأنها (كذا، وكذا) يعني زانية، لا تقوليلي الكحل سنة، ولا البرفان سنة، سنة في بيتكم يا غالية.

- خدي بالك من خطوات الشيطان يا جميلة زي مثلاً: 
الأناقة والشياكة، وماله لما أخفف حجابي، ما كل البنات لابسة كدة، محدش هيبصلي، أنا مش شايفة راجل على مد البصر في البلكونة أدخل بسرعة وراسي مكشوفة..
ألخ. 

رابعًا: حبيبتي إحنا ملبسناش الحجاب في الشارع وبقينا مكبوتين.. 
تقومي لما تقعدي مع النساء تقلعي تمامًا! لا يا غالية مينفعش، فيه حدود مع النساء، البسي حشمة معاهم، وخدي بالك من العيال الصغيرة..
ما تقولي ابن الجيران صغنن! لا يا قلبي، ومش بالبلوغ مجرد أن الطفل يبدأ يتكلم على النساء وياخد باله منهن، استتري منه مش تاخدي ابنك وابن الجيران وتدخلي تستحمي وتقولي عيال! وعلمي بنتك وابنك الحياء. 

خامسًا: اجتهدي الله يكرمك، إحنا مش بنحفظ بس إحنا بنحاول نطبق.
اجتهدي واعملي اللي تقدري عليه عشان رمضان قرب أهو، ربنا عز وجل بيحب التقرب إليه بما افترضه علينا.
فابدأي واعملي وتقربي إليه، يتقرب إليك ملك الملوك سبحانه وعز وجل.