الشبوره جامده النهارده في حاجه خضرا جايه من بعيد اهيه دى بتقترب علينا هو ده بقى الاتوبيس الاخضر اللى بندوروا عليه ايه ده علبة سردين العيال دى كلها جايه منين ده الاتوبيس هينفجر من التضخم السكانى اللى جواه

الخالق الناطق اتوبيسنا بس فرق الدوكو

نجاتى المشرفاتي: اركبى يا انسه

اركب فين يا عم انت اسطح فوقيه ولا اتشعلق في السبنسه الامر لله ابرمي يا أم خلف قل لن يصيبنا الا ما كتب الله لنا

البالطو البالطوووووووو طار في الهوا شاشى وقطنى وبالطيه وقف ياعم

انت يااااااااد هات البالطو ده احسن والنعمه اشتكيك لامك احدف ياد من الشباك لاخرملك عينك يخرب عقلك الواد وقعه في الارض وبقى شبه بالطو الافوكاتو اصبر عليا لما ارجعلك يا حمص يا ابن ام حمص

لا مؤاخذه يا كابتن معلش يا هندسه سوري يا انسه حاسه انى راكبه مرجيحه براحه يا عم الاسطى الله يسترك دماغى بتلزق في السقف مع كل زلطه بيتعتر فيها الاتوبيس امال لو مطب بقى هنلمس السحاب

معلش يا انسه كتر خير الاتوبيسات واحمدى ربنا دى من ايام محمد على مكانوش يعرفوا السوست وقتها تعالى اقعدى على الموتور

تقولوش شيزلونج حاجه كده مفروشه موكيت جنب كرسى السواق على طول وظهرى لازاز الاتوبيس

الاسطى: انتى شكلك في طب

البالطو عامل عمايله (فى سرى) اه اول يوم النهارده وحضرتك اسمك ايه يا ابويا

الاسطى

: محسوبك عمك جبر

لماضة

: الله يجبر بخاطرك

الا ايه الخشبه اللى انت حاطيتها تحت دى أنا شايفه كمان الاسفلت من تحت هي الارضيه راحت فين

الاسطى

: الخشبه دى عشان اسند بيها مكان الفرامل الارضيه اتاكلت من زمان

لماضة

: ااااه دى عوامل التعريه اللى كانت في الجغرفيا اللى ذاكرتها في درس اليوغسلافيا

الاسطى

: كتر خيره انه بيوصلكوا بس مقدرش امشى بيه بسرعه عن كده ولا اطلع او انزل كبارى

لماضة

: الله يطمنك ياعم جبر كتر خيرك الاتوبيس طاير الصراحه على سرعة 2 بطه في الساعه