في يوم الحادثه كانت أختي تقوم بأعمال المنزل والطبخ وهي وقتها كان لديها ثلاث أطفال 7 سنين و 3 سنين وسنه وكانوا كلهم في غرفتهم يلعبون المهم قام ولدها أبو ثلاث سنين من عند أخوانه وراح للصاله والله العالم إنه راح لشباك الصاله وقام يلعب بحبل الستاره وكان غير مثبت و بطريقة ما إلتف الحبل حول رقبته و إنخنق به ومات ولم يلاحظه أحد خصوصًا إن الستاره كانت مغطيه عليه ويادوب رجوله من تحت باينه وكمان كان صوت التلفزيون مرتفع و أختي وقتها كانت في المطبخ بتطبخ والمطبخ له باب مفتوح على الصاله ومن العجيب إنه كان بين أختي و ولدها حوالي الثلاث أمتار فقط ومع ذلك كانت غير منتبها لما حدث لولدها بسبب إنهماكها في الطبخ والتنظيف وبعد ما إنتهت راحت للغرفه إلي فيها أولادها يلعبون ولاحظت غياب ولدها أبو الثلاث سنوات و دورت عليه في البيت كله لأنه بيتها كبير نوعًا ما المهم قالت أكيد متخبي و يبغاني أدور عليه يعني يلعب معاها فراحت للمطبخ تطل على غداها وطبعًا لازم تمر بالصاله إذا كانت رايحه للمطبخ فشافت رجول ولدها من ورى الستاره وسبحان الله كأنه واقف فصارت تنادي عليه وهو مايرد عليها بسبب إنه كان ميت لحظتها لكنها ماتدري تحسبه يلعب معاها فقربت منه ومسكت الستاره و كشفتها عنه وهي تقوله كفشتك وكانت صدمتها لقت الحبل ملفوف حول رقبته وعيونه متقلبه و أعزكم الله متبول على نفسه فسبحان الله ربنا ثبتها وقدرت تفك الحبل عن رقبته وهي تكلمه وتناديه لعل وعسى يرد عليها وجرت و اتصلت بالتلفون على أحد من أهل زوجها وجاء و أخذو الولد و ودوه المستشفى والدكتور كشف عليه وقال إنه متوفي له فتره المغزى من ذكر التفاصيل ..

أختي تبغى تعرف إيش إلي عليها تسويه ناس قالوا لها لازم تصومي شهرين لأن الولد مات بسبب إهمالكِ

وللعلم طفلها رحمه الله كان معروف بذكائه و حركته الكثيره ..

وسبحان الله بعد 9 شهور بالتمام من وفات ولدها ربنا رزقها ببنت ..