أرشيف الشعر العربي

ليك يا بلد

ليك يا بلد

مدة قراءة القصيدة : دقيقتان .

ليك يا بلد

بحمل هموم الشوق

حنين

و ألقاك عوالم من فرحْ

و امزج دواعي الإلفه ريد

و انسج خيوط الليل مرح

شوق المطر

فى سكة السفر الجديد

مسكون بألوان من قُزح

***

آه يا بلد

يا أغلى من كل الحروف

العابره من بحر الغرام

يا أسمى من وهج الصباح

لما النهار

في حضنو نام

اتوسّدَت كتفك شجون

ضاعت خطاويك

في الزحام

أنا خوفى من بعدك أتوه

في غابه

ما بتعرف سلام

في ليل فتح

باب المواجع للضلام

في كل لحظه

بتصحى في الزمن الكلام

كيف يبقى قلب الناس حجر

في حضنك السامى المقام

***

ما تخاف على الحق

يا بلد

ح تهب رياح طين الجروف

تحمل عبير الموج مدَدْ

و يطلع زمان الحب سنابل

في وسط حزناً هجد

و يجونا أطفال المدارس

لا بتقيف بينم هواجس

لا وساوس

في طريق ما ليهو حد

و يطلع مطر خير الأرض

و يتحول الرصاص ورد

و كل النجوم

النايمه من خلف السحاب

تظهر تبين فى ليل سَعد

و القمره و التاج الأمين

فوق الجبين

نلقاهو فى لحظه اتولد

و يسكت في أعماقنا السكون

تتحول الهمسات رعد

و تعود معزّتنا الزمان

و الإمتنان

عز القبيله الكان غمد

و الضحكه تطلع و الحنان

و الكلمة و الوقفه النبيله

خطى الأمان

و جواز سفر

لى كل وسيله

ترجِّع الغاب و ابتعد

و انا يا بلد

وسط الدروب المستحيله

رحله فى غيم الهجير

تايه مع الأشواق دليله

و أملى فى السكه الطويله

أصلو لا خاب

لا اتفقد .

اخترنا لك قصائد أخرى للشاعر (معز عمر بخيت) .

أمة من اليراع والورق

آخر الكلام أنت

شريان الليل وهمس الوحدة

فليشهد المطر

و تشرق فى عينيك شمس الوطن


المرئيات-١